fredag 24. januar 2014

Bibliotekåret 2013 del 2

Det er alltid litt spennande på starten av eit nytt år å sjå på statistikken for førre år. Korleis gjekk det med utlånstala? Har besøket gått opp eller ned? Kva er den mest lånte boka? Er det barbiefilmane som var mest utlånt i fjor også? J

Litt oversikt har vi jo. Vi rekna med at Jo Nesbø si bok «Politi» skulle ligge heilt i utlånstoppen og at vi ville finne «Karsten og Petra» bøker der også. Litt overraskingar er det alltid likevel. Men først over til utlånstala, for det er dei vi synest har vore mest stas.
Vi hadde ein mistanke om at utlånet vårt hadde auka i 2013 samanlikna med 2012, men vi hadde ikkje trudd at auken skulle vere så god som den var. I 2013 hadde vi alt i alt 30 480 utlån, av dette var 21 253 bøker. Dette var ei auke på 26 % frå 2012! Dette er inkludert fjernlån av bøker, men ikkje inkludert skulebøkene til vidaregåande som kjem utanom dette. I tillegg såg vi også ein auke på rundt 30 % i besøk innom biblioteket samanlikna med 2012. Dette synest vi er veldig kjekke tal! Det er ekstra kjekt sidan vi veit at vi hadde ei auke i utlånet i 2012 også.

Stryn er ei stor og langstrakt kommune og det er langt til biblioteket for veldig mange. I motsetnad til ein del andre kommunar har ikkje vi lenger filialar og mange får difor ikkje mogelegheita til å gå på biblioteket sjølv om dei skulle ønskje det.  Vi er difor ekstra imponert over at stryningane er så flinke å bruke biblioteket sitt!

Kva var så dei mest populære bøkene og filmane?
Den mest utlånte boka uansett aldersgruppe i fjor var Tor Åge Bringsværd si bok «Karsten og Petra vil lære å svømme». Det var heile tre «Karsten og Petra» bøker inne på topp 10 lista over utlånte bøker i fjor. Så det er tydeleg at Karsten og Petra held seg populært framleis.
Blant vaksenbøkene var det tett kamp mellom Victoria Hislop si bok «Tråden» og Jo Nesbø  si bok «Politi». Jo Nesbø var mest utlånt, men sidan Victoria Hislop si bok vart fornya fleire gongar så vann den ein knapp siger. No skal det seiast at Jo Nesbø si bok ikkje vart gjeva ut før i juni, så den «tapte» eit halvt år i utlån. Andre bøker som var populære var bl.a.: Trude Teige sin krimroman «Svik», Jeff Kinney sine pingles dagbøker, Francesca Simon sine bøker om Rampete Robin og Frid Ingulstad sin romanserie «Sønnavind».   
På filmfronten var det Kon-Tiki som vart mest utlånt, tett følgt av Hotel Transylvania og komedien Ted. Etter desse gjekk det mykje i «Karsten og Petra»  og opptil fleire Barbie-filmar.
Vi er veldig glad for at biblioteket er så populært og vil gjere vårt beste for at det skal halde seg slik. Men vi veit også at vi ikkje kan forvente slike tal kvart år og vi er veldig glad så lenge folk er nøgde med tilbodet. Vi veit at det er mange ting vi kan bli betre på, og det satsar vi på at vi skal bli også J


5 på topp

Skjønnlitteratur barn og ungdom
 
 
 
1.       Karsten og Petra vil lære å svømme av Tor Åge Bringsværd
2.       Karsten og Petra kjører brannbil av Tor Åge Bringsværd
3.       Søppelmysteriet av Unni Rom  Stueland
4.       En pingles dagbok 3: Siste stikk av Jeff Kinney
5.       Karsten og Petra på teater av Tor Åge Bringsværd
Faglitteratur barn og ungdom
 
 
 
 
1.       Elefant av Meredith Costain
2.       Gorilla av Meredith Costain
3.       Min første sykkel av Susanne Szesny
4.       Barnehagen min av Doris Rübel
5.       Kroppen vår av Doris Rübel
Lydbøker og digikort barn og ungdom
1.       Søppelmysteriet/Forsvunnet i venneskogen (Vennebyen)
2.       Doktor Proktors tidsbadekar av Jo Nesbø
3.       Doktor Proktors prompepulver av Jo Nesbø
4.       Folk og Røvere i Kardemomme by av Thorbjørn Egner
5.       Rampete Robin og zombie-vampyren av Francesca Robin
 
 
Spel
 
 
1.       Kaptein Sabeltann og ildprøvene
2.       Flåklypa Grand Prix
3.       Josefine og drømmespeilet
4.       Vinter i blåfjell
5.       Knerten gifter seg
 
Film barn og ungdom
1.       Hotel Transylvania
2.       Karsten + Petra
3.       Barbie i et havfrueeventyr
4.       Barbie & diamantslottet
5.       Madagaskar 3: Full rulle i Europa


Skjønnlitteratur vaksne
1.       Tråden av Victoria Hislop
2.       Politi av Jo Nesbø
3.       Svik av Trude Teige
4.       Dona Maria av Cecilia Samartin
5.       Sønnavind nr. 58: Troløs av Frid Ingulstad
Faglitteratur vaksne
 
1.       Oppdrag mottro av Linda Eide
2.       Regines bok av Regine Stokke
3.       Jeg tenker nok du skjønner det sjølv: historien om Christoffer av Jon Gangdal
4.       Nord-Korea: ni år på flukt fra helvete av Eunsun Kim.
5.       Veien til førerkortet av Dagfinn Moe.
Lydbøker  og digikort vaksne
1.       Dona Maria av Cecilia Samartin
2.       Politi av Jo Nesbø
3.       Flink pike av Gillian Flynn
4.       Svik av Trude Teige
5.       Tråden av Victoria Hislop
 
 
Film vaksne
1.       Kon Tiki
2.       Ted
3.       Hobbiten
4.       The Hunger Games
5.       Hope Springs
 
Tidsskrift
1.       KK
2.       I form
3.       Bonytt
4.       Maison interiør
5.       Familien
 
 
 

 

torsdag 23. januar 2014

Bibliotekåret 2013

Vi er allereie komme eit stykke på veg i 2014 og det er difor kjekt å kunne sjå litt tilbake på bibliotekåret 2013. Samarbeid har vore stikkordet for bibliotekåret 2013. Det har blitt eit tettare samarbeid mellom biblioteka i fylket, starta av fylkesbiblioteket sitt prosjekt «Saman for framtida».  Vi har byrja på eit mykje tettare samarbeid med dei andre Nordfjord-biblioteka som vi håpar skal slå positivt ut for alle partar. Vi på Stryn bibliotek har også fått eit tettare samarbeid med lag og organisasjonar i kommunen og med barnehagar og skular. Det har vore veldig positivt og utviklande for biblioteket.

Nasjonalt skjedde det mykje i 2013. Norsk bibliotekforening (NBF)  feira 100 år og folkebiblioteka fekk ein ny formålsparagraf. Det heile vart toppa av at folkebiblioteka fekk Brageprisen sin heiderspris. Vi er så ubeskjedne at vi meiner det absolutt var fortent! J

For oss på biblioteket var det mykje å glede seg over i 2013. Det aller beste var å få besøk av publikum. Gjennom eit heilt år har det vore berre blide ansikt å sjå på biblioteket. Til og med når vi gjer feil, for det skjer jo inni mellom, så er det absolutt ingen som blir sinte. Det gjer oss glade! J

Vi prøvde oss fram med litt fleire arrangement enn før dette året. Det har vore veldig spennande. Spesielt sidan ein aldri veit om det er noko folk vil komme på. Men stryningane har ikkje svikta oss. Vi har vore veldig godt nøgde med oppslutnaden på alle arrangementa.

Så kva har vi gjort i 2013?

·         I februar markerte vi den internasjonale morsmålsdagen saman med barnehagane i kommunen med song og høgtlesing. «Den lille larven aldri mett» vart lest på forskjellige språk til stor glede for dei 25-30 deltakarane, både store og små. Vi gler oss til å arrangere ein ny morsmålsdag i år også, så det er berre å sette av 21. februar i kalenderen!

·         I april hadde vi barneteater: 60 stk. fekk gleda av å sjå «Ulla krulle og den forsvunne kosesauen Bæ-bæ». Eit veldig bra teater som vi trur alle likte godt.

·         I mai hadde kulturskulen minikonsert for rundt 30 publikum. Ein ny kulturskulekonsert er allereie på programmet 10. mai i år, så det er berre å byrje å glede seg.

·         Vi prøvde for første gong å arrangere «Sommarles». Mange andre bibliotek i landet har hatt stor suksess med det før og no ville vi også prøve. Det freista  absolutt til gjentaking J 56 unge og ivrige deltakarar deltok og las i alt 70 000 sider! På sommarlesfesten i september møtte det opp endå fleire. Vi var om lag 80 stk. som feira ilag med ordførar, skule-og kultursjef og ikkje minst Georg Lipai! Tusen takk til sponsoarane våre: Sparebanken Sogn og Fjordane, Det Norske Samlaget og Stryn kulturhus og kino!

·         Kvart år i september er det oktoberfest i Stryn. Vi prøvde å henge oss litt på med å spandere pølse og lompe til alle gjestane våre på torsdagskvelden. Veldig kjekt!

·         I oktober fekk vi besøk av ordføraren. På den nye langopekvelden vår på torsdagar  var han tilgjengeleg for alle som ville slå av ein prat. Dette var så positivt at vi gjentok suksessen nokre veker seinare og satsar på å halde fram med jamne mellomrom i 2014 også.

·         Den 31. oktober var det tid for Halloween på biblioteket. Vi «kledde oss ut» og arrangerte Halloween-løype. Morsomt til og med for bibliotekarar J

·         Kvart år i november er det kulturnatt i alle kommunane i Nordfjord. På biblioteket i år kom Anny Berge Alsaker for å presentere og selje boka si «Nordfjorddiktaren Amund Mork og samtida hans». Vi hadde også besøk av historielaget som solgte årboka si. Begge bøkene er absolutt å anbefale. Kvelden vart toppa av konsert på biblioteket med DamJam kl. 22!

·         I slutten av november arrangerte vi den første av det vi håpar blir fleire lokalhistoriske kveldar saman med historielaget. Arnold Nesje kåserte og Svein Nesje spelte fele. Oppslutnaden var over all forventning med over 50 stk. i publikum.

Utanom dette har vi sjølvsagt hatt fleire utstillingar gjennom året. Vi har markert 250-års jubileet til fylket, kvinnene sin stemmerett, Munch-jubileet, krigsutstilling med bomba som øydela kommunehuset under krigen osv. osv. . ..Utstilling er noko av det kjekkaste vi veit! Og vi må understreke at de må ikkje vere redde for å ta va bøkene vi stiller ut. Det er difor vi har dei der. J

Noko av det vi var mest spent på i år var korleis dei nye opningstidene våre ville bli tatt imot. Vi gjekk bort i frå å ha ope til kl. 17 og 18 på kvardagane og stengde heller kl. 16 på alle dagar utanom torsdagane  då vi har langope til kl. 20. Dette hadde samanheng med lite besøk etter kl. 16 og eit håp om å gjere noko meir ut av torsdagskveldane våre. Det ser ut til å ha gått veldig fint. Vi har fått gode tilbakemeldingar og besøket har i alle fall ikkje gått ned.
Vi ser veldig fram til det nye året. I 2014 kjem e-bøker til biblioteket. Stryn er med på eit samarbeid med fylkesbiblioteket og dei andre biblioteka i fylket om å starte opp med e-bøker allereie i vår. Underteikna skal ut i permisjon og det kjem inn ein veldig flink ny biblioteksjef som kjem til å komme med mange nye idear som bibliotekbrukarane i Stryn vil få stor glede av. Forfattar og historikar Hans Olav Lahlum kjem på besøk til oss i månadsskiftet mars/april, vi skal arrangere morsmålsdag og sommarles, vi skal feire Grunnlova og Alf Prøysen og mykje meir. Det blir eit fantastisk år!

tirsdag 14. januar 2014

Fotballarrangement på biblioteket

Fotball – lidenskap eller galskap?

Ragnhild Lund Ansnes har gått frå å hate fotball til å bli første kvinne i verda til å skrive offisielle klubb-bøker i erkekonservative Premier League.
No brukar ho sine erfaringar frå å ha forska på fotballkulturen og det å ha skrive to bøker om Liverpool FC til å motivere ungdomsskuleelevar og folk flest til å følgje draumane sine, til å snakke om viktige sider av det å vere menneske og til å gje eit annleis blikk på kva fotball gjer med folk.
Det starta som ein radiodokumentar for NRK P2 («Du vil aldri gå alene») i 2008 der Ragnhild ønska å finne svar på kvifor hundretusenar av nordmenn er hekta på engelsk fotball og kva fotballen gjer for fansen. Dokumentaren blei den mest høyrde av alle dokumentarar det året. Programskaparen sat med mange hundre upubliserte, sterke historier frå norske Liverpool-fans. Med hjelp av professor i psykologi, Arne Vikan, skreiv ho bestseljaren «Liverpoolhjerter» i 2010.
Det er funn frå denne boka og oppfølgjaren «Liverpoolhelter» (offisiell LFC-bok om korleis det er å vere mennesket bak spelaren i internasjonal toppfotball) samt Lund Ansnes sine fem år på innsida av Liverpool FC som ligg til grunn for ein landsomfattande turne for den kulturelle skulesekken. Ragnhild Lund Ansnes har no sagt opp jobben i NRK P1 for å jobbe heiltid med fotball! 
Tysdag 28. januar  kl. 19. kjem forfattaren på besøk til Stryn bibliotek.  Biblioteksbesøket i Stryn er i samarbeid med Stryn Fotball og er ope for alle. Gratis inngang.
Ein må absolutt ikkje vere Liverpool-supportar for å komme eller spesielt interessert i fotball for den del. I følgje Ragnhild Lund Ansnes sjølv kan det vere like interessant for dei som står litt på utsida, men som kanskje er mor, far, tante, dotter, gift med etc. ein lidenskapeleg fotballsupportar.
Bloggen til Ragnhild Lund Ansnes http://liverpoolhjerter.no blir lesen i 41 land.

fredag 22. mars 2013

Spennande lesning om middelalderen

Jomfruen fra Norge

Forfattar: Tore Skeie


Jomfruen fra Norge tar for seg selve skjebnetimen for det norske kongedynastiet i middelalderen.

Tidlig på høsten 1302 møttes en norsk konge og en svensk hertug på en holme i Göta älv. Der inngikk de en krigsallianse. For å besegle forbundet, lovet kongen bort sin ett år gamle datter. Han visste ikke at han samtidig la kongerikets skjebne på hennes små skuldre.

Jomfruen fra Norge tar for seg selve skjebnetimen for det norske kongedynastiet i middelalderen. Da Håkon 5. arvet kongsmakten ved inngangen til det urolige 1300-tallet, var han Nordens mektigste mann. Under ham nådde det norske riket sitt kulturelle og politiske høydepunkt. Men gjennom datterens forlovelse med den både ridderlige og hensynsløse hertug Erik av Sverige, ble han dratt inn i et maktspill som skulle få uante konsekvenser for Norges historie.

Dette er ei sakprosabok som sterkt kan anbefalast til alle som har interesse for norsk og skandinavisk historie. Tore Skeie er ein veldig flink historikar og ikkje minst ein veldig flink formidlar av det stoffet han har forska på. Boka er utruleg lettlesen, omtrent som ein roman. Og innhaldet er minst like spennande og med eit like utruleg innhald som ei kva som helst romanhistorie.
Boka er interessant om ein spennande tidsepoke i norsk historie, og viktigast av alt den gjev lyst til å vite meir om denne epoken. Eg kan nærast garantere at når du er ferdig med å lese denne boka så vil du finne fram historiebøkene for å sette deg meir inn i denne historiske perioden. Det gjorde i alle fall eg. Det er berre å glede seg.

fredag 22. februar 2013

Serieromanar

På biblioteket har vi fleire serieromanar som er veldig populære. Mange har vi hatt i fleire år, og bøkene vert stadig utlånt. I haust har vi fått ein del nye seriar inn på biblioteket. Først og fremst frå snille folk som har tilbode oss dei. Dette synest vi er kjekt fordi vi veit at det er mange som set pris på å lese dei. Difor har vi bytta ut nokre av dei eldste seriane og sett dei på magasinet slik at vi har fått plass til dei nye i hyllene våre. No vil vi gjerne at fleire skal oppdage desse bøkene, og vite at det er mogeleg å låne dei hos oss.

Ein kort presentasjon:

Arvesynd
Forfattar: Anne Lise Boge
Indre Nordmøre 1910. Mali kjem frå ein fattig familie, men vert lagt merke til i bygda på grunn av sin vakre utsjånad. Odelsguten på den rikaste garden i bygda, Johan, er ein av dei som legg merke til ho. Han tilbyr ekteskap og Mali må gifte seg mot sin vilje for å redde familien. Men ein dag møter ho sjølv kjærleiken…

Barn av stormen
Forfattar: Merete Lien
Jomfruland 1790. Den 17 år gamle Agnethe bur på vakre Jomfruland med det ville havet rett utanfor døra. Ho elskar øya, men mest av alt elskar ho Johannes. På grunn av vondt blod mellom familiane er det vanskeleg med kjærleiken. Samtidig blir ho forvirra av den mørkhåra mannen som heile tida dukkar opp i draumane hennar.

Folket på Lindstad
Forfattar: Rune Angell-Jacobsen
Sør-Trøndelag på midten av 1800-talet. Victoria Lindstad er arving til storgarden Lindstad. På garden jobbar Jacob som Victoria vil gifte seg med. Dette fell ikkje i god jord hos faren, men Victoria vil kjempe for kjærleiken.

Fossefall
Forfattar: Jorunn Johansen
Finnskogen 1874. Bondedottera Amalie har forelska seg i skogfinnen Mitti, men ho er redd for kva foreldra vil seie når dei finn ut at ho er kjæraste med ein finnegut. Amalie slit også med minner frå då ho var lita jente. Ho var vitne til at ein mann kasta ei kvinne i fossen. Kven var kvinna? Vart ho drepen? Og er den som drap ho framleis i området?

Hannah
Forfattar: Laila Brenden
Hemsedal 1826. Hannah er godseigardotter frå Danmark, men har slått seg ned saman med ektemannen Engebret på garden Rudningen i Hemsesal. Ein dag ho er aleine heime er det storm og i stormen dukkar det opp ein mystisk framand mann med intense blå auge.

Havets datter
Forfattar: Trine Angelsen
Lofoten 1870. Elisabeth er seksten år og skal byrje å arbeide på storgarden Dalsrud. Ho har aldri vore borte frå barndomsheimen før og gler seg til å prøve noko nytt. Samtidig har ho ei vond kjensle i kroppen av at ikkje alt blir like enkelt.  

Ingebjørg Olavsdatter
Forfattar: Frid Ingulstad
Eidsvoll 1352. Svartedauden har herja i Noreg, og tatt med seg mellom anna far til Ingebjørg. Det er Ingebjørg som finn faren og hos han finn ho også tre gjenstandar som vil følgje ho, både som ei velsigning og som ei forbanning. Ho har eit hemmeleg forhold til Eirik, men veit at mora aldri vil tillate eit forhold mellom dei. Ho har sine eigne planer for dottera. Ingebjørg Olavdatter er bygd på eit middelaldertestament som framleis eksisterer.

Livets lenker
Forfattar: Christin Grilstad Prøis
Gudbrandsdalen 1850-åra. 18 år gamle Elen veks opp lukkeleg på fjellgarden Heimsett. Familien har aldri hatt god råd, men det Elen ikkje veit er at faren har sett dei i stor gjeld. Doktoren i bygda tilbyr seg å redde garden frå tvangssal, men han har eitt krav. Han vil ha Elen som brud.

Livsarven
Forfattar: Ann-Christin Gjersøe
Vestfold i 1880-åra. Dei to søstrene Abelone og Ellen veks opp på garden Gimle med ein far som er klokkestøypar. Dei er nært knytt til kvarandre og kusina Blanche som bur i Tønsberg. Som døtrer i velståande familiar får dei tre jentene oppleve at det ikkje er alt dei får bestemme sjølv, også kven dei skal gifte seg med.

Morsarven
Forfattar: Anne Lise Boge
Morshjerte omslagsbildeLandvik 1928. Kjøpmannsdottera Maren, dotter av bygdas einaste kjøpmann, er forelska i fattigguten Trond. I bygda er det eit strengt skilje mellom dei som har pengar og dei som ikkje har det. Dette får Maren og Trond kjenne på kroppen.

Nordlysets døtre
Forfattar: Ellinor Rafaelsen
Mo i Rana 1905. Kaja veks opp på eit småbruk litt utanfor Mo. Ho forelskar seg i rallaren Gustav som er komme til Mo i Rana for å få arbeid ved det store jernverket som er under oppføring der. Ho rømmer med han til Mo, men der skal det vise seg at skjebnen har andre ting som ventar ho.

Rosehagen
Forfattar: Merete Lien
Bergen og Kragerø på slutten av 1880-talet. Emily bur i Bergen saman med mora. Ho har hukommelsestap og hugsar ikkje noko frå tida før ho var ti år gamal. Ein dag oppdagar ho at livet ho har levd har vore basert på løgn.

Storgårdsfolk
Forfattar: Eva J. Stensrud
Hedemarken 1810. Johanna er odelsjente på storgarden Store Guldberg. Ho er ikkje redd for å seie si meining og tek alltid dei svakaste sitt parti. Ho er trulova med naboguten, men er usikker på om han er det rette valet. Samtidig dukkar det opp fleire hemmelegheiter som ho må hanskast med.

Sønnavind
Forfattar: Frid Ingulstad
Oslo 1905. Elise er 18 år og arbeider på eit spinneri ved Akerselva. Saman med veslesøstera forsørgjar ho familien på seks. Mora er sjuk og faren drikk. Elise er kjæraste med naboguten Johan som ho har vore ven med sidan barndomen. Ein kald januardag finn Elise ein gjenstand i snøen. Denne skal få dramatiske følgjer for henne og Johan sitt liv.

Teppefall
Forfattar: Kamilla Mathisen og Gro Gravem
Nordland/Oslo notid. Andrea drøymer om å bli skodespelar. På trass av at mora er sterkt imot det dreg ho til Oslo for å prøve lukka. Der får ho nye vener og møter draumemannen. Men snart merker Andrea at det er noko som ikkje stemmer.

Thea
Forfattar: Trine Angelsen
Lofoten 1910. Kjøpmannsdottera Thea skil seg ut i den lille bygda i Lofoten. Ho er vakker og har sterke meiningar, og sjølv om det er mange som er forelska i ho har ho ingen planer om å bli saman med nokon av dei. Ikkje før besteveninna sin fetter vender tilbake frå Amerika…


 
I tillegg har vi også desse litt eldre seriane: Skjebnespill, Kystfolket, Livets døtre, Sara vakker, Tidemann, Amerika og ikkje minst Sagaen om Isfolket. Den siste er innbunden. Vi har også fleire innbundne seriar. Kom og lån!  J

 

fredag 15. februar 2013

Monstermenneske

Forfattar: Kjersti Annesdatter Skomsvold

Frå forlaget:
Da hun var sytten år, løp hun fortest og lengst og var ikke til å stoppe, men så stoppet alt opp. Kjersti skulle egentlig studere til å bli ingeniør, men ligger i stedet på gamlehjem. Hun hører en dame dø på den andre siden av veggen. Kjæresten orker ikke å bære henne lenger. Kjersti tenker at hvis hun kan klare å skrive en roman, vil hun igjen føle seg som et menneske. For en roman må være skrevet av et menneske. Hun begynner å skrive på gule post-it-lapper som hun klistrer på veggen over senga. Monstermenneske stuper inn i det syke, det stygge, det vakre, det selvransakende og det sårbare, med tankevekkende alvor og sjenerøs humor. Hvordan slutte å være redd og bli et menneske ute i verden?


Endeleg fekk eg også lest denne boka. Ei bok som er blitt rost opp i skyane av kritikarane. Dette er noko av det dei skriv:

- Dette er stor litteratur ... I beskrivelsene av forholdet mellom fiksjonen og virkeligheten, er Skomsvold i særklasse. Hun har skapt en metaroman, en roman om å skrive en roman.

- I over en uke har jeg levd med Montermenneske. At det nå er over, kjennes feil. Jeg håper Kjersti Skomsvold fortsetter å skrive bøker jeg kan leve med i framtida"

- Roll over, Karl Ove, det er en ny mester av selvbiografiske romaner in town!


Etter å ha lest boka seier eg meg samd med kritikarane. Dette er ei veldig god bok skriven av ei ung jente som vi kjem til å høyre mykje meir om i framtida. Dette er den andre boka til Skomsvold og den første Jo fortere jeg går, jo mindre er jeg vann blant anna Tarjei Vesaas debutantpris for 2009.

Første delen av boka er den beste og også den sterkaste. Det er vondt å lese om korleis ho som ei ung jente med alle mogelegheiter foran seg må ligge på sjukeheim med eldre folk som døyr rundt ho. Men sjølv opp i alt det vonde klarer Skomsvold kunststykket å vere morsom. Ho er morsom på bekostning av seg sjølv, men ikkje på ein måte som gjer at ein ler av ho, men av situasjonane som ho skildrar så godt. Boka er på heile 600 sider og det skal vere ein god roman for å halde på lesaren heile vegen. Men det klarer Skomsvold. Du heier på ho og håper slik på at ting skal gå betre, at sjukdomen skal sleppe taket. Samtidig flyr sidene av gårde.

Eg gler meg til Kjersi Annesdatter Skomsvold si neste bok!

Finn boka på biblioteket


fredag 1. februar 2013

Barnebokanbefaling

Billedbok for dei aller minste


For kort tid sidan fekk vi inn to nye billedbøker på biblioteket. Desse var så fine at eg måtte låne dei med heim til mi vesle jente. Der fall dei i smak med ein gong. Dei har blitt lest igjen og igjen, og har vore dei bøkene som raskast har blitt tatt fram frå hylla. Så det er nesten slik at eg litt motvillig no har tatt dei med tilbake til biblioteket. Men no er det på tide at nokon andre små barnehender får glede av dei.

Bøkene heiter "Jeg er glad i deg pappa" og "Jeg er glad i deg mamma", noko som ikkje akkurat gjer lysta hos foreldra mindre til å lese dei....Historiane er fine og gjenkjennelege, men det aller beste med boka er dei nydelege illustrasjonane. Difor har eg tatt nokre bileter så de sjølv kan få sjå. Dette er bøker som absolutt er verdt å låne, og som er kjekke å lese for store og små.